Շարունակում ենք փնտրել տաղանդավոր երիտասարդների զարգացմանը նպաստող նոր մոդելներ․ Անի Թադևոսյան

Բոլորին հետաքրքրիր է՝ ինչո՞վ է տարբերվում «Բայազետ» կենտրոնը տարածաշրջանի մյուս հասարակական կազմակերպություններից կամ հիմնադրամներից։ Ո՞րն է ձեր այսպես կոչված «այցեքարտը»։

—Բավականին երկար և մեծածավալ հարց է․ փորձեմ սեղմ պատասխանել։ Նախ հիշեցնեմ, որ «Բայազետ» կենտրոնը Գեղարքունիքի մարզի առաջին և դեռևս միակ վերլուծական-հետազոտական կենտրոնն է, որով առաջնահերթ իր բնույթով տարբերվում է տարածաշրջանի մյուս ՀԿ-ներից և հիմնադրամներից։

Երկրորդ․ «Բայազետ» կենտրոնը շարունակում է մնալ անկախ և ապաքաղաքական կառույց, որն իր ընթերցողին մատուցում է օբյեկտիվ տեղեկատվություն՝ տարածաշրջանի անցուդարձի վերաբերյալ։

Երրորդ․ «Բայազետ» կենտրոնը իր շուրջն է համախմբել մասնագիտական տարբեր ուղղվածության երիտասարդների, ովքեր ցանկություն ունեն Գավառ խաշորացված համայնքի ապագային միտված քայլեր ձեռնարկելու։

Անի, Ձեր կարծիքով, այսօր ամենաշատը ի՞նչն է պակասում «Բայազետ» կենտրոնին:

—Մեր կենտրոնն արդեն ունի մեկ տարվա պատմություն, որի ընթացքում հասցրել է համալրվել շատ տաղանդավոր երիտասարդներով։ Գործունեության առաջին տարին խորհրդանշական էր կատարված վերլուծությունների, հետազոտությունների, հարցազրույցների և գրադարանագիտական աշխատանքի ծավալով։ Այս ամենին զուգահեռ, որպես համայնքային նախաձեռնություն՝ մենք շարունակում ենք փնտրել տաղանդավոր երիտասարդների զարգացմանը նպաստող նոր մոդելներ։

Ըստ իս, այժմ «Բայազետ» կենտրոնին անհրաժեշտ են ներքին և արտաքին համագործակցություների ավելացում․ մեր առջև դրված 5 նպատակների իրականացման համար մեզ անհրաժեշտ է արհեստավարժ փորձագիտական հանրույթի աջակցությունը։ Խոսքը մենթորների մասին է, ովքեր կառաջնորդեն մեզ իրենց փորձով։ Մենք կիսում ենք յուրաքանչյուրի կարծիքը, պատրաստ ենք ընդունելու բոլորի խորհուրդները, որոնք ուղղված են Գավառի բարելավված ապագային։ Իսկ Գավառը զարգացած համայնք դարձնելու գրավականներից մեկը՝ երիտասարդ-մենթոր երկխոսության կայացումն է։