Որոնում ենք մենթորներ, ովքեր կօգնեն մեզ բարդ հարցերին ավելի պատրաստ լինել․Հասմիկ Իսրայելյան

Հասմիկ, ինչպես գիտեք Գավառում երիտասարդների ներգրավվածությունը ՏԻՄ-ում ցածր է, Դուք ինչպե՞ս եք փորձելու աջակցել երիտասարդների ներգրավվածության բարձրացմանը։

—Հետաքրքիր են այն չափանիշները, որոնցով ՏԻՄ-ում երիտասարդների ներգրավվածությունը ցածր կամ բարձր է գնահատվում։ Նախ մենք պիտի հաշվի առնենք, որ գործ ունենք արդեն խոշորացված Գավառ համայնքի հետ։ Խոշորացումն իր հետ մի շարք մարտահրավերներ և խնդիրներ է ավելացրել՝ ներառյալ Ձեր հնչեցրած հարցը։ Այս փուլում մենք փորձում ենք համեմատել փոփոխությունները․ արդյո՞ք վերջին ՏԻՄ ընտրությունների ընթացքում կամ դրանից հետո եղել են նկատելի փոփոխություններ։

Ընդհանուր դեպքում կարող ենք նշել երիտասարդների մասնակցայնության և նախաձեռնողականության պասիվություն համայնքների կառավարմանը վերաբերող հարցերում՝ այդ թվում ՏԻՄ-երում։ Ինչու եմ նշում սա, քանի որ պարզ է, որ ՏԻՄ-ում երիտասարդների ներգրավվածությունը բխում է ընդհանուր ակտիվության մակարդակից։ Մյուս կողմից՝ երիտասարդը կարող է ընդգրկված լինել ՏԻՄ-ում, բայց հետաքրքրվածությամբ և որևէ գործունեությամբ հանդես չգալ, լինել օտարված և նրա ձայնը չլինի որոշիչ։ Այստեղ մենք բախվում ենք ձևի և բովանդակության տարբերությանը, իսկ «Բայազետ»-ն իր առաջ խնդիր է դրել բացահայտել և աշխատել հատկապես բովանդակության ուղղությամբ։ Դրա մասին է վկայում մեր կազմակերպության 5 նպատակները․ իրավունքի գերակայություն, կրթության անընդհատություն, կայացած քաղաքացիական հասարակություն, տվյալներով հիմնավորված որոշումներ և իհարկե ուժեղ համայնքներ։Այս կետերն, ըստ էության, բխում են ժողովրդավարության զարգացումից կամ, այսպես ասած, միտված են դրան՝ այդ թվում երիտասարդների ակտիվությանն ու ՏԻՄ-երում նրանց որոշիչ ներգրավվածության բարձրացմանը։

Նկատենք նաև, որ «Բայազետ»-ն այնպիսի երիտասարդների ընդլայնվող միություն է, որոնք շատ հետաքրքրված են ՏԻՄ գործունեությամբ և դրա վերահսկողությամբ։ Այդ երիտասարդներն են նաև, որ վաղը ՏԻՄ-ում ընդգկվելու խնդիր կցանկանան դնել իրենց առաջ։

Ինչպե՞ս է «Բայազետը» փորձում ստեղծել կապ ՏԻՄ-ի և ՔՀԿ-ների միջև։

—Այս հարցի շուրջ մեր աշխատանքները բխում են ուժեղ համայնքներ ունենալու նպատակից, սակայն մինչ այդ ավելի մեծ խնդիր է քաղաքացիական հասարակության ձևավորման և կայացման հարցը. արդյո՞ք մենք հասել ենք դրան և արդեն կապի ստեղծում ենք փնտրում։ Ցավոք մեր ստացած ժառանգությունը բավականին թույլ է։ Դա մեզ չի հուսահատեցնում, մենք կհասնենք այդ փուլին հանրային ֆունկցիոնալ մտքի կազմակերպմամբ և առկա ինտելեկտուալ ներուժի նյութականացմամբ, ինչից հետո նաև ՔՀԿ-ների, ՔՀԿ-ների և ՏԻՄ-ի միջև կապի։ Իմ համեստ կարծիքով և մեծ հույսով՝ վերջինիս հետ կապված խնդիրներ չենք ունենա, քանի որ այս պահին էլ կարողանում ենք ՏԻՄ-ի հետ կապ ապահովել։ Այն նաև կառուցողական է թվում, իսկ թե ինչպիսին կլինեն կոնկրետ արդյունքները, կհասկանանք առաջիկայում։

Ինչպիսի՞ խորհրդատվություն եք իրականացնում քաղաքացիների համար, որպեսզի նպաստեք հանրապետությունում հիմնադրույթային հայեցակարգի ձևավորմանը։

—Հաճախ ենք զրուցում տարբեր համայնքներ ներկայացնող մարդկանց հետ, առաջարկում մեր օգնությունը, պատասխաններ որոշ հարցերի։ Գուցե և սա նպաստում է դրան։ Մենք ունենք մեծ նպատակներ, նախաձեռնողականություն աշխատանքի, կրթվելու, կրթելու, զարգանալու և զարգացնելու համար։ Միևնույն ժամանակ այնքան ամբիցիոզ չենք, որ այս պահին արվածը անվանենք՝ խորհրդատվություն հանրապետությունում հիմնադրույթային հեյեցակարգի ձևավորմանն ուղղված։

Մենք անկեղծ ենք, գիտենք մեր կարողությունները, հնարավորությունները և կարիքները։ Մշտապես միտված ենք շարունակական աճի ու զարգացման։ Հիմա որոնում ենք մենթորներ, ովքեր կօգնեն մեզ բարդ հարցերին ավելի պատրաստ լինել։

Հանրային իրազեկմանն ուղղված մեր աշխատանքը տվեց իր արդյունքը Գավառի ՏԻՄ ընտրությունների ժամանակ, քաղաքացիները այն ողջունեցին։ Հիմա հետազոտական աշխատանքների իրականացման փուլում ենք, աշխատում ենք, որ դրանք լինեն համակողմանի։ ՏԻՄ-ի և համայնքի կառավարման հարցերում մեր ներգրավվածությունը ուղղում ենք տվյալներով հիմնավորված որոշումների պահանջին, ինքներս էլ առաջնորդվում ենք այդ տրամաբանությամբ։
Ձգտում ենք հասնել Ձեր հարցին․ ժամանակ և օգնություն է պետք։ Արդեն նկատվում է «Բայազետ»-ի գործունեության արդյունավետությունը։ Մենք պատրաստակամ ենք և հավատում ենք, որ այս նպատակների շուրջ կհամախմբվեն նոր, հետաքրքիր, թարմ, առողջ գաղափարներով երիտասարդներ տարբեր տարածաշրջաններից, ինչպիսիք արդեն կան։