Նկատելի էր, որ «Բայազետ»-ը նեղ շահեր հետապնդող խմբակ չէ, այլ ինտելեկտուալ, զարգացող և սկզբունքային երիտասարդների միասնություն․ Հասմիկ Իսրայելյան

Ես ակտիվ քաղաքացի եմ, ինձ հետաքրքրում են մեր պետության հնարավորություններն ու խնդիրները։ Ուսանողական տարիներից անդամակցում եմ տարբեր կազմակերպությունների, որոնք օգնում են իրականում ճանաչել Հայաստանի խնդիրների պատճառները և թեկուզ փոքրիկ ներդրում ունենալ դրանց լուծման գործում։ Վաղուց ունեմ համոզմունք, որ Հայաստանի զարգացման ճանապարհը ժողովրդավարության և պետական ինստիտուտների կայացումն է, ինչը կարող է իրականանալ միայն ռեսուրսների ապակենտրոնացման, համայնքների ուժեղացման և զարգացման դեպքում։

Ծնվելով և ապրելով Գավառի տարածաշրջանում՝ ես խորքից գիտեմ նրա ռեսուրսները, կարծրացած խնդիրները, բնակչության կարիքները, խութերը, որոնք նեղացնում են մեր ճանապարհը և թույլ չեն տալիս «բաց ծով» դուրս գալ, ուստի «Բայազետ»-ից ստացած հրավերը դիտարկեցի որպես հնարավորություն, ճանապարհ մեր համայնքի զարգացմանը նպաստելու համար։ Կառավարման խորհրդի անդամ դառնալուն համաձայնելուց առաջ երկար ուսումնասիրել եմ կենտրոնը կայացնող մարդկանց։ Նկատելի էր, որ «Բայազետ»-ը նեղ շահեր հետապնդող խմբակ չէ, այլ ինտելեկտուալ, զարգացող, սկզբունքային, նույն արժեհամակարգի կրող, նույնիսկ համայնքից դուրս գործող երիտասարդների միասնություն, որոնց նպատակները լուրջ են, ազնիվ, անկողմնակալ և ռեալ։ Մեր տարածաշրջանն իսկապես ուներ այսպիսի կենտրոնի կարիք, որն ընդլայնվող է և ոչ սահմանափակ, որի գործունեությունը հիմնվում է հետազոտությունների և աներևույթ, խորքային խնդիրների բացահայտման վրա, որտեղ կրթության ու մշակույթի դերը բարձր է, դրանց արդյունավետությունը՝ կարևորված։

Գիտե՞ք, ակնհայտ պրոբլեմների մասին անվերջ կարելի է խոսել, դժգոհել։ Դա լուծման համար ոչ անհրաժեշտության, ոչ էլ բավարարության պայմանները չի ապահովում, իսկ հատկապես փակ համայնքերում, գումարվում է նաև այն, որ մարդիկ խուսափում են խոսել անհանգստացնող հարցերի մասին։ «Բայազետ»-ում մեր գործունեությունը այդ պայմանները բացահայտելու համար է, որոնց ապահովմանն էլ ուղղում ենք մեր ներուժն ու ջանքերը։

Ես հավատում եմ նպատակաուղղված, ակտիվ և համառ աշխատանքի արդյունավետությանը։ Մեծ ցանկությամբ ու պատրաստակամությամբ՝ մեզ կհաջողվի ամրացնել մեր ընդլայնվող կազմը, նպաստել Հայաստանում ժողովրդավարության զարգացմանը՝ խթանելով երիտասարդների ակտիվ մասնակցությունն ու հետաքրքրվածությունը համայնքի կառավարման հարցերում, դարձնել մեր և մեր կողքին ապրող մարդկանց կյանքն ավելի լավը, իրավունքներն՝ ավելի պաշտպանված։

Ես ուրախ եմ, որովհետև գտել եմ այն, ինչ փնտրում էի։ Այժմ գործելու ժամանակն է։