Մենք բաց ենք քննարկելու համագործակցության ցանկացած առաջարկ, որն առընչվում է Գավառի ավելի լավ ապագային․ Ավետիք Խոստեղյան

Ավետիք, Դուք վերջերս եք միացել «Բայազետ» կենտրոնին, ի՞նչը եղավ Ձեր ոգեշնչման աղբյուրը, որ որոշեցիք միանալ նորաստեղծ թիմին։

—Հետաքրքիր է, որ ակտիվ հետևելով երիտասարդական նախաձեռնություններին՝ դրանց դերին ու նշանակությանը, և առավելապես ոգևորվելով Գավառի երիտասարդության ձեռքբերումներով, մինչ այս միտք չեմ ունեցել որևէ թիմի անդամ դառնալ։

«Բայազետ» կենտրոնի գործունեությանը սկսել եմ հետևել գրեթե ստեղծման օրվանից։ Բախտ ունենալով ներկա լինել կենտրոնի կողմից կազմակերպված հանդիպումներին, ֆորումներին և սեմինարներին՝ կարողացա ծանոթանալ կենտրոնի նպատակների, որդեգրած սկզբունքների ու գաղափարների հետ, և տպավորություններս միմիայն դրական էին։ Բնավորությանս համաձայն սկսեցի ուսումնասիրել թիմը և տպավորվեցի արդեն երկրորդ անգամ, քանի որ, երբ պատկերացնում ես կատարված աշխատանքի չափն ու տեսնում գաղափարակից երիտասարդներից կազմված թիմը՝ չես կարող սովորական վերաբերմունք ունենալ։

Հենց այս հանգամանքներով ոգևորված՝ որոշեցի հնարավորության դեպքում միանալ թիմին։ Ի ուրախություն ինձ դարձա թիմի անդամ, և հիմա արդեն վստահ կարող եմ ասել, որ սա իմ լավագույն որոշումն էր։

Նորաստեղծ կազմակերպության համար շատ կարևոր է ոչ միայն տեղական, այլև միջազգային կազմակերպությունների հետ համագործակցությունը։ Ի՞նչ մեթոդներ եք կիրառում արտաքին գործընկերների հետ ամուր կապի ստեղծման և ապահովման համար։

—Ընդհանրապես համագործակցությունները կազմակերպության շարունակական զարգացման կենսական նախապայմաններից են, և ըստ իս միջազգային կազմակերպությունների հետ համագործակցությունը շատ կարևոր է և՛ նորաստեղծ, և՛ երկար տարիների կյանք ունեցող կազմակերպությունների համար։

Որպես միջազգային կազմակերպությունների հետ համագործակցության վառ օրինակ՝ կարող եմ նշել Erasmus Students Network միջազգային ուսանողական ցանցի հետ համագործակցությունը, որի արդյունքում մտադիր ենք Գավառում մի շարք ծրագրեր իրականացնել, և լիահույս ենք, որ գաղափարի իրագործմանը կաջակցեն նաև ՏԻՄ-ը, տեղական կազմակերպությունները և անհատները։

«Բայազետ» կենտրոնը բաց է քննարկելու համագործակցության ցանկացած առաջարկ, որը առընչվում է Գավառի ապագային։ Անչափ կարևորում ենք և՛ ներկայիս գործընկերների հետ հարաբերությունները, և՛ ապագայում հնարավոր համագործակցությունները։ Այս մասով ցանկանում եմ նշել նաև, որ «Բայազետ» կենտրոնը պատրաստ է դառնալ համագործակցության հարթակ այլ կազմակերպությունների համար, ինչը հնարավորություն կտա գաղափարակից ուժերին համախմբել ընդհանուր նպատակի շուրջ։

Կնշե՞ք ամենահաջողված համագործակցությունը (որը ինչ որ չափով խթան հանդիսացավ որևէ կարևոր գործի կատարմանը կամ առաջխաղացմանը)։

—Թույլ տվեք համեմատության մեջ չդնել մինչ այս մեր ունեցած համագործակցությունները, քանի որ դրանցից յուրաքանչյուրը՝ առանց բացառության, միանշանակ խթան են հանդիսացել որևէ կարևոր գործի կատարմանն ու առաջխաղացմանը, ինչի համար մենք չենք կարող երախտապարտ չլինել։

Հարցը դիտարկելով այլ կոնտեքստում՝ տեղական ու միջազգային կազմակերպությունների հետ ունեցած համագործակցություններից զատ, կարող եմ հստակ արձանագրել, որ Կենտրոնի հաջողության և առաջխաղացման գերկարևոր խթանը՝ առկա համագործակցությունն է թիմի ներսում։