10 նոյեմբեր, 2022

Երևանում շարունակվում են «NextGen» քաղաքական առաջնորդության ակադեմիայի դասընթացները

Հոկտեմբերի 22-ից Երևանում մեկնարկել է NextGen քաղաքական առաջնորդության ակադեմիան։ Դասընթացներին մասնակցում են 30 ընտրված երիտասարդներ՝ ՀՀ բոլոր մարզերից, մայրաքաղաք Երևանից և Արցախից։ Ակադեմիային մասնակցում է նաև «Բայազետ» կենտրոնի խորհրդի անդամ Հասմիկ Իսրայելյանը։

NextGen-ում բանախոսությունները վարում են տարբեր ոլորտների առաջատար մասնագետներ, գիտնականներ, հետազոտողներ, քաղաքական և պետական գործիչներ: Բանախոսությունների հետ մեկտեղ իրականացվում են գործնական առաջադրանքներ, հարց ու պատասխան ձևաչափով քննարկվում մատուցված բանախոսությունը, որի շնորհիվ մասնակիցները ամրապնդում են ստացած գիտելիքները։

Հիշեցնենք, որ NextGen քաղաքական առաջնորդության ակադեմիան իրականացվում է «Ռեստարտ» գիտակրթական-բարեգործական հիմնադրամի և Հանրային Քաղաքականության Ինստիտուտի կողմից՝ Պրահայի քաղաքացիական հասարակության կենտրոնի աջակցությամբ։ Այն կտևի 7 շաբաթ և կեզրափակվի հունվարին՝ ձմեռային հնգօրյա ճամբարով։