Իրիտացիոն տեխնոլոգիաներ
Մարդկանց մեծ զանգվածներ ներգրավելը ենթադրում է նրանց կառավարման տեխնոլոգիաների և հաղորդակցման գործիքակազմի հմուտ կիրառում: Հասկանալու համար՝ ինչպես է դա հնարավոր, անհրաժեշտ է դիտարկել սոցիալական տեխնոլոգիաների տարբեր տեսակներ: Տեխնոլոգիա ասելով հարկ է պատկերացնել նպատակին հասնելու մարտավարական քայլերի հաջորդականությունը: Ուսումնասիրելով արդեն իսկ տեղի ունեցած «թավշյա հեղափոխությունները»՝ կարելի է առանձնացնել գործողությունների հետևյալ շարքը՝ բողոքի ակցիաներ, երթեր, գործադուլներ, դասադուլներ, նստացույցեր, հանրային շենքերի ու փողոցների արգելափակումներ և այլն։ Սակայն այս գործողությունները պետք է այնպես նախագծվեն, որպեսզի համապատասխանեն տվյալ հասարակության մշակույթին, ազգային արժեքներին, սովորույթներին, պատմությանը: Միայն այդ դեպքում է հնարավոր իրականացնել քաղաքացիական անհնազանդության ակցիաներ, խախտել ընդունված նորմերը, «աղմուկ» առաջացնել համակարգում5 , կառավարել ամբոխը և միևնույն ժամանակ քրեական պատասխանատվության չենթարկվել։ Այս նպատակներին են ծառայում մարդկանց մեծ զանգվածների վարքի կառավարման իրիտացիոն տեխնոլոգիաները, որոնք ապահովում են վարքի սահմանված նորմերից շեղում, սակայն օրենքի խախտում չեն հանդիսանում։Իրիտացիա հասկացության հիմքում անգլերեն «irritation» բառն է, որը թարգմանաբար նշանակում է «գրգռում», «զայրույթ»: Իրիտացիոն տեխնոլոգիաներն «աղմուկ են առաջացնում համակարգում»: Լումանի մեթոդաբանության մեջ «իրիտացիա» եզրույթը մեկնաբանվում է որպես «շեղում», «գրգռում», «վրդովմունք», «անակնկալ» 6 : Սոցիալական համակարգերը միմյանց վրա ազդում են իրիտացիաների միջոցով՝ արձագանքելով արտաքին միջավայրի այն իրադարձություններին, որոնք բավական «աղմուկ» են առաջացնում համակարգում։
Ամբոխի կառավարման իրիտացիոն տեխնոլոգիաները (Հայաստանի «թավշյա հեղափոխության» օրինակով),
«Բանբեր Երևանի համալսարանի. Միջազգային հարաբերություններ, Քաղաքագիտություն», Երևան, 2020 № 3 (33), էջ 46-62
ամբողջական տարբերակը՝
http://www.ysu.am/files/04Y_Melkumyan_L_Vardanyan.pdf...